Mir fiire Gottesdienscht vor Fasnacht hie i dr Chiuche Für Grossi, Chliini, Dünni, Dicki, Schöni und ou Kniuche Vo nah u färn sit härzlech willkomme, liebi Lüt Hüt git’s nüt, wos git, u aus wos nid git, git’s hüt
Dr Pfarrer im Kostüm no viu schlimmer aus schüsch U es ertöne ganz unerwarteti Grüsch D Orgele stiu u gliich s’ isch lut wie no nie Schön sit dir hüt aui derbii
Tönlifurzer Gugge wo dir scho ghört heit Si schränze u trummle wie gschtört - s isch e Fröid Wes nech de tüecht, stöht uf tüet nech bewege tüet tanze U merci am Sigrischt wo aus iigrichtet het – dä isch jitz scho zimlech am Ranze
Fasnacht u Gottesdienscht, chunnt äch das guet? I weiss es nid – i dänke aber, dä Versuech tuet Not S git geng gründ zum Gränne u Gründ zum Fröid ha Drum sägis no einisch: Schön sit dir da
Bir Vorbereitig hei Värsli mini Gedanke afa fluete U die fluetende Värsli tueni öich jitze zuemuete Es si Värsli zum lache u Värsli wo preiche U wenn’s muess si, stahni öich hüt gärn uf d Scheiche
Aus Pfarrer isch me sicher nid politisch Vilich höchschtens hie u da chli kritisch Aber de Rächte, muess i aanäh, dene stinkts Wiu si wüsse, dä Pfarrer hie, dä isch links
Mi Vatter het mi glehrt: Bueb, griff nach de Stärne Nach de grosse, chline, de nache und ou de färne Aber Stärne gits nümm viu ‘s tuet mi verdriesse Wiu d SVP tuet aui Stärnli abschiesse
Aus Pfarrer isch me sicher nid politisch Vilich höchschtens hie u da chli kritisch U doch die Lingge hie tüechts fürchterlech Wiu dä Pfarrer hie isch bürgerlech
I ha dänkt, i chönnt doch mal e Raschtafriise trage Uuu da muess i vorhär gschider d Funicello frage Si het gmeint e Raschtafriise für mi sig scho okei Wiu i sowieso scho glii e Glatz heig
Ir Blick-Redaktion trifft grad e nöii Mäldig i Diräkt us dr Bundesratssitzig, früscher chönnt si nid si Sogar für e Blick geits jitze ds zwiit, mit dene Indiskretione Si bringes nid, das Biud vom Berset oben o…
Die linkki Stad Bärn het Gäld vo dr Fifa entlehnt Hie ds Langethal wär das wahrschiinlech verpönt dr Priis das mer is dr Infantino mit sim Scheiss müesste la gfalle Isch viu viu ds höch, sogar für ne nöii Iischhalle
Im Verhörrum seit mir dr Polizischt: Mir wüsse Dir heit aus Chind kulturell aageignet u müesst derfür jitz büesse Ds Indianerspiu, sägeni, ja das gibeni zue Aber i bi geng Old Shatterhand gsi u nie dr Winnetou
Dr Vasella het wölle Stüüre spare U isch drum churz uf Monaco abe gfahre Das är jitz gliich mues zahle fingt är chliinlech U i dänke, dä Typ isch doch nume no piinlech
I bi eismau uf mim Chueli nach Olte gritte U aus Langethaler muess i säge: läck hani glitte Die hei Iischhalle, swiss Leage, d Aare u so viu meh Was mi am meschte wurmt isch, die hei sogar es Budget
Es heisst aumes gross, ds Volk heig entschide Im Fall vom Budget, si drüviertu vom däm Volk blibe lige U d Mehrheit vom Räschte het nei gstimmt s’isch zum brüele Die hei sich doch au nume mau wie dr Vasella wöue füehle
Ghöret dir se ou immer lütter gränne Mir dörfe nid emau me säge was mer dänke E Widerspruch in sich ha i mir überleit Wiu die wo das säge hei doch aus wo si dänke scho gseit
Mir Schwyzer si neutral, s isch immer e so gsi Im Wettkampf vo de grosse wärde mir nie parteiisch si Wenns jitze da im Oschte so gruusig chlepft u tätscht Rüefe mir höchschtens Hopp Ukraine, aus wär’s e Schuttmätsch
Schreibe einen Kommentar