Vorwort

Vorwort

Bibleschi Gschichte ghöre sit chlii uf zu mim Läbe. Vor allem die us em Aute Teschtamänt: Moses, Gideon, Samuel, David, Daniel, dass si Näme vo de Helde vo mire früechschte Chindheit. Natürlech het ou Jesus derzue ghört, aber är het im Vergliich zu de andere biblische Gstaute e bsunderi Position gha, viu meh Heiland aus eifach Vorbiud. Bibleschi Gschichte us em Aute wie us em Nöiie Teschtämänt begleite mi mittlerwile sit meh aus 50 Jahr.

E für mi sehr wärtvolli Witerbiudig het mir de Handwärkzüüg gäh, zum sälber chönne Gschichte verfasse und verzelle. I ha de gmerkt, wie viu Fröid mir das macht, e Gschicht ds entwickle und de ou vordstrage oder ufdsfüehre. Natürlech ha ni de ou müesse merke, dass e gueti Gschicht ds verfasse sehr viu meh ds tüe git, aus e aaständegi Predig zämedstelle.

D Gschichte u Texte i däm Büechli haute sich i Vilem nid genau a die bibleschi Vorlag. I ha mir mit dr Zyt bim Gschichteverzelle einegi Freiheite erloubt, immer mit em Ziu, das, wo ni aus Chärn vo dr biblische Botschaft resp. dr verzellte Gschicht verstande ha, usedsschaffe u nachvollziehbar ds mache. I hoffe, das sigi mir hie u da mit de vorliegende Gschichte ou glunge.

Die vorligende Erzählige u Texte si in erschter Linie für Erwachseni und interessierti Jugendlechi. Si si nume bedingt oder ou gar nid für Chind geignet. Die meischte Gschichte si i Zämearbeit mit Jugendleche entstande, e paar wenegi ir Einsamkeit am Schribtisch.

I ha probiert, d Erzählige so wit ufdsarbeite, dass me se mit überschoubarem Ufwand eifach chönnt vorläse oder verzelle. I fröiti mi, wenn hie u da vo dene Gschichte verzellt oder sogar mit Musik würde ufgfüehrt würde.

Danke möchte i a dere Stell mire Chiuche, dr ‘refbejuso’, für d Müglechkeit, so nes Projektli im Rahme vo nere Uszyt umdssetze. Mini Chiuche isch aues andere aus perfekt u mängisch ou närvtötend, aber dass si e so nes grosses Dach bietet, dass aui, wo wei, mit däm, wo si gloube, dörfe drunder stah, um zäme u mitenand ds Dasii ds fiire, isch e Wärt, wo i Zyte vo Verurteilige u Beschuldigunge, vo Rächthabereie und Wahrheitsaasprüch, nid höch gnue cha veranschlagt wärde. Freiheit isch immer grundlegende Bestandteil vo Liebi.

Dr gröscht Dank geit a mini Familie, wo aui Gschichte, wo ni mache, die ufgschribene und vor allem ou die andere …, au die Jahr scho mittreit und mitgstautet. Es isch es Vorrächt und es Gschänk, Teil vo dere mängisch chli unmügleche ‘Herde’ ds sii.

Auguscht 2024                                                                                Cédric Rothacher