Boah, scho zwo Wuche här, dass i öppis postet ha. Isch trotzdäm viu ggange uf dr Site und ou schüsch.
Korrigiere u düreläse u düreläse u korrigiere – jitze fäuht nümme viu, und es erschts Büechli, öppe 100 Site mit 6 Gschichte und äbeso vilne Texte derzue, wird de i Druck gschickt.
Sobald das dusse und einigermasse guet ufgleiset isch, mache ni mi a nes zwöits. I bi no nid ganz sicher öb mit eher umfangriiche biblische Gschichte für Chind (David, Josef, Daniel) oder mit de Erzählige vom St. Patrick und vom St. Brendan, zwene grosse irische Heiligefigure. Aues immer uf Bärndütsch – versteit sich vo sälber.
D Gschichte vom Pfarrer Ruedi Halbise si no nid ganz riif – es fähle no zwöi oder drü vo sine Aabetüür, für dass es da öppis Aaschtändigs chönnt gäh. Und d Frag-mänt allei fülle no keis Büechli…
Uf dr andere Site ha ni zimlech ar Homepage resp. am Blog umebaschtlet und ha sogar öppis wie nes Shöpli fangs iigrichtet. Ha sehr viu glehrt derbi. Me gseht das a de ABG’s, ar Netiquette und am Impressum, wo si ergänzt worde.
U de no anders Züüg vo Wäge AHV-Biiträg, Mehrwärtstüür u Mäldepflicht ha ni glehrt – so Vorschrifte haut. Nume guet, dass bi mim bishärige Umsatz (Fr. 0.-) es no es Momäntli wird duure, bis villich öppis dadervo relevant wird, wenn überhoupts. Aber i ha Fröid gha, dass i mi da ha dörfe u chönne derhinder chlemme.
I ha mir i dene Wuche aber ou viu Zyt gnoh für mi 30. Hochzytstag – dadernäbe isch e Blog und es Büechi und anders nid würklech wichtig.
Kommentar verfassen