Fertig….

UPS het gliferet… zwo Chischte …

Es isch scho cool, was aues mit Internet u Digitalisierig isch müglech worde. Zum Bispiu eifach es Buech usedsgäh, wo i aune gängige Internet-Verchoufstelle erhätlech isch mit ere eigete ISB-Nummere etc. Es isch scho speziell, uf Amazon, Thalia, Exlibris es eigets Buech ds finde.

Positiv überrascht bi ni vo BoD – Books on Demand, däm Internet-Verlag, wo so viu Arbeite im Vorfäld vo nere Veröffentlechung übernimmt, wie me wott. Sehr unkompliziert u sehr transparänt, ou grad was d Chöschte betrifft, cha me, ou we me viles oder aues sälber macht, viu Bürokratie eifach abgäh. U we me Frage het, findet sich uf Youtube immer ou es hiufrichs Fiumli. Ou we mis Projektli relativ eifach isch gsi, so aus Nöiling bi ni doch rächt guet dri cho und es het aues ribigslos funktioniert.

I bi ou erstuunt gsi, dass es doch rächt gäbig geit, e eigete Internet-Shop ds kreiere, wo me mit Kreditcharte u Twint etc. cha zahle. Natürlech, es isch nid ganz gratis, i mim Fall 3% + 30 Rappe pro Verchouf (www.zahls.ch), derfür ha ni schüsch null Chöschte, und es klappet.

Jitze, wo mi Studieurloub langsam ds Ändi geit, luegeni uf ene spannendi Zyt zrügg vo Schribe, Redigiere, Internetsitebaschtle, Shopiirichte, Städtereise und zwüschedrii immer ou Velofahre.

I danke mire Chiuche und mine Kolleginne u Kollege, wo das Projekt e so hei müglech gmacht, mire liebe Frou für ds Gägeläse u aune, wo mi ermuetiget und understützt hei.

Wär gärn wott, cha das Büechli grad hie uf dere Site im Shop chouffe.