Langethal 2024 Wahlkampf am Fasnachtsmärit

Vor zwone Wuche vor em Huus steit e riisige Laschtwage
Är bringi mir, seit dr Chauffeur, hüt d Gmeindswahlunterlage
E riise schwetti a Papier mit Föteli vo Gringe
Es tuet mir Leid, i cha nid anders u muess jitz paar Strophe singe

Mit Photoshop het d FDP iri Lüt fescht retuschiert
Het Fäuteli u Faute eifach eliminiert
So jung wie die da usgseh, muesch sicher nümm lang warte 
u de het Langethal im Stadtrat doch no e nöiie Chindergarte

Ou d SP het das Chindergartefiasko nid verdout
U het de drum für ds Wahlplakat e Stadt us rote Chlötzli bbout
Es riise dürenand das Biud, cha mi chum orientiere
Bim Bahnhof heig sech die für das Plakat la inschpiriere

Bisch grüeniberal wosch nume ds beschte grad vo zwöine Wälte
Da söu dr Umwältschutz u d Wirtschaft beides gliich viu gälte
Das tönt innovativ, originell und i ha aus ganz brave
Intressiert dr Flyer ganz wöu läse u bi derbii iigschlafe

Dass die etablierti SVP de die grüenliberale
I Flyer- Fantasielosigkeit mit irem Sünneli wird überstrahle
Hät i im Ärnscht nid dänkt, dä wo dä Flyer denn het gmacht
Muess e Gheimagänt vo de Lingge si, wo sich jitz i ds Füüschtli lacht.

Mit emne Fautblatt, wo, we das usfautisch, gross wird wie mi Tisch
Bringe die Grüene iri Botschaft, wo ne würklech wichtig isch
I ha ohni’ s läse sofort tchegget, was ds Plakat seit-  i bi schlau
Mit grüen wär d Zuekunft nümme schwarz, die würdi höchschtens grau

U d EVP wirbt wie immer i de Farbe gälb u blau
Die einzegi Partei i de Farbe vo Langethal
U die vor EVP, die chönnte villich mau d Wält rette
We die Fromme ou mau gieng ga wähle u nid nume würde bätte

Die Jungliberale, das muess i ine eifach niidlos la
Hei aus einzeigi Partei  uf em Flyer, eh itz lug ou da
Iri Kandidate schwarzwiiss druckt u i chas nid ganz vermiide
Ds dänke, öb si, we si mau gwählt si, geng no farblos bliibe

D Lischte 49 mit dreine gstandne Manne, ja die het
Mi zrügg i mini Chindheit gfüehrt, i ha mi erinneret
A Justus, Peter, Bob - me chönnts nid besser preiche
D Lischte 49, das si die drü Fragezeiche

S isch no nid lang här, da het Langethal imperialistisch expandiert
U churzerhand, so tüecht es mi, ds Oberstäckhouz annektiert
Me het dänkt paar Undertane meh, das isch sicher gar nid dumm
U jitz griife doch die  fräche Hagle nach em Stadtpräsidium
 
Warum dr Reto uf si Flyer Biudli vo sine Chind het ta
Weiss i nid, villich macht me das aus Stapi eifach so
Doch i Sache Familiebiudli het är jitz e Konkuränt
U i frage mi, wär äch dr Patrick ou gärn Stadtpresidänt?

So Wahlbroschüre, das si würklech ganz dankbari Sache
Für mi aus Värslischmid zum Värslischmide und mi luschtig mache
Doch dr Respäkt für wär sich für üsi Stadt iisetzt, dä wott i bhaute
U wär hüür nid geit ga wähle söu när 4 Jahr d Schnurre haute