I lise i de letschte Site vo dr Bibu, D Vision vom nöiie Himmu u dr nöiie Ärde Wo du wirsch bringe E Wält ohni Tod, ohni Trurigkeit, ohni Chlag u ohni Qual Aues wird nöi, aues isch nöi Wie am erschte Tag vo dr Schöpfig U aui wo Durscht hei überchöme vom Wasser vom Läbe bis gnue
Ja, Gott, Weni um mi luege, dänki: Mach vorwärts! Ändlech Mit dire, dere nöiie Wält
Du gsesch ja Üsi isch zimlech am Rumpf D Mönsche hei weder Sorg zu sich no zu dere Schöpfig Wo du ine aavertrout hesch
Wie guet wärs Wemer no einisch chönnte aafa Vo vorne, ganz nöi
Weisch E so unbeschwärt So schamlos glücklech Das aui u jedes doch no cha erblüeie Wie du’s vo auem Aafang a i iri Härze gleit hesch
Ja Gott, mach aues nöii
Aber säg Warum de da no das Meer Us brönnendem Schwäfu Wo du aui drinne entsorgsch Wo dir nid passe? Isch das würklech nötig?
Warum e zwöite Tod für aui Wo nid bestande het?
Wo blibt da dini Liebi? Wo blibt da dini Vergäbig? Isch de Jesus für aui die Wo da wäggheit wärde Nid ou gschtorbe?
Das darf doch nid wahr si! Das passt jitze Ehrlech gseit Überhoupts nid Zu mine Idee vo däm Was es sött bedütte Wenn’s e nöii Ärde Und e nöiie Himmu git
Sicher nid e so Da wott i kes Meer us brönnendem Schwäfu Für aui die, wo nid gnüegt hei Geit’s no? De chöimer doch grad witerfahre Wie bis jitze
U de si da plötzlich die unbequeme Frage Es Flüschtere Wo dür mini Gedanke geischteret Öb i de überhoupts e nöii Wält möcht? Das ganz andere? U wieni mir die Wält de vorstelle?
Aues irgendwie guet u fridlech u versöhnt? U de sött de gliich irgendwie Aues bim Aute blibe?
Di Frag a mi: Was muesch Du aues ablege u wäggheie Für dass Du ine Wält ine passisch Wo’s ke Tod, ke Truur, ke Chlag und keis Liide me git?
Säg Wie viu blibt no vo dir Wenn du dis Liide Dini doch so berächtegti Wuet Dini Verletztheit Dis 'i ha uf jede Fall Rächt' Dini Truur U dini Schönfärbereie Mau näbe use tuesch?
Lue Au dä Plunder het I Gottes nöiier Wält nüt verlore Das darfsch nid mitnäh
Wenn’s würklech nöi söu wärde Richtig nöi, So ganz anders De gits viles Viles ou wo di usmacht Wo ke Platz me het Wo de muesch zrügglah Oder haut äbe Verbrönne Vergässe Vergäh
U jitze auso Wosch geng no e nöii Wält? Oder eifach nume Dass das, wo du kennsch Ersetzt Oder eifach restauriert u poliert wird?
Nöii heisst:
Was vorhär isch gsi Das isch nümme U was isch Isch vorhär nid gsi
Gottes nöii Wält Isch nid eifach Zuckerwatte u Plüschtier Sondern erwartet offebar Dass i mi ganz u gar Däm uslifere Wo usem Nüt use Aues i ds Dasii rüeft Däm, wo Tots Wieder läbig macht Däm, wo aues Aues nöi macht
Kommentar verfassen