I gloube, mis vierte ‘Rock the church’ isch das gsi, wo mer mit de Schüelerinne und Schüeler is intensiv mit dr Versuechigsgschicht (Lk 4, 1-13) usenandergesetzt hei. I ha, das weiss i no, wäge dr Reihefolg vo de Versuechige er Version vom Lukas dr Vortritt gäh, vor dere vom Matthäus (Mt 41-11). D Antwort vo Jesus a Versuecher, ‘dr Mönsch läbt nid vo Brot allei’, isch ömu denn sehr kontrovers diskutiert worde, und eis Meitschi het sich fasch gar nid erholt: ‘We du, Jesus, d Macht hesch, Steine i Brot ds verwandle, chaisch du dr Hunger uf dr Wält beände u so viu Nöt lindere. Warum machsch du das nid?!?!’. E berächtegti Frag, u d Antwort vo Jesus isch doch zimlech happig, u laht eim e chli ratlos zrügg: ‘Dr Mönsch läbt nid vo Brot allei…’
I ha denn e Sprächgsang (i ha mi nid derfür, das aus Rap ds bezeichne) gschribe, wo drei Situatione ufnimmt vo Mönsche, wo das, wo si bruuche, im Momänt ds mingscht nid überchöme.
Im Lied sälber ha nis chli uf d Spitze tribe mit de letschte beide Strophe. D Schüelerinne u d Schüeler hei denn, vor sibzäh oder achtzäh Jahr, gfunde, das sig zimlech brutal. I ha ne denn äuä scho chli viu zuegmuetet. Mi tüechts eifach, ersch we me d Sach uf d Spitze tribt, oder we me e Gränze ritzt, merkt me, was öppis wärt isch. Mit nume Wattestäbli, wos mängisch ou bruucht, u dicke Polschter , wo mängisch überläbenswichtig si, chame e Sach nume ganz schlächt uf e Punkt bringe.
Hie jitze auso no d Strophe füf u sächs vo däm Lied, wo dr Titu treit ‚Nid vo Brot allei‚
Strophe 5
Es isch es Zimmer ohni Farb u aues isch dezänt
Nume d Aazeig am Grätli lüüchtet e Momänt
U es Schlüüchli verschwindet im Arm vo däm Patiänt
Wo under wiisser Dechi um sis Stärbe kämpft
Scho sit Wuche jede Tag di Plag u de chunnt d Frag
Wie lang no söu das ga? Darf är nid ändlech ga?
U dr Arm blibt stiu u ds Mu blibt zue
U d Ouge gseh i däm bleiche Zimmer inne
Immer meh ine hälle Schimmer ine.
Strophe 6
Da isch dr Dokter, wo chunnt u ne Chittu treit
Verständnis zeigt u de ou gärn wider geit
U au die Lüt, wo no wei hallo säge
U jitz nach mänger Stund
Macht se d Stilli nümm verläge
Wiu aues chunnt wies chunnt.
U si verhandle hin u si verhandle här
U si studiere was u wie u wo u wenn u wär
U schliesslech fragt dr eint dr ander zimlech knapp:
Was isch? Lö mer la louffe oder stelle mir ab?
Chorus
Wär git dir das, wo de bruuchsch zum läbe?
Wär git dir das, wo du di drann chaisch häbe?
Nimmt är di gfange? Macht är di frei?
E Mönsch läbt nid vo Brot allei
Kommentar verfassen