Geschter ha ni d Mäldig übercho, d UPS bringi mir am Mäntig zwöi Päckli vo BOD (Books on Demand), mit nid ganz 12000 bedruckte Site im Format 15×22. I bi chli närvös, wiu i mi scho Frage, weli Böck i äch gschosse ha, weli Fähler i nid ha gseh u öbs nid irgendwie piinlech wird… s isch drum handglismet…
Uf dr andere Site het mir d Redimensionierig vom Projekt (hie d Erklärig derzue) scho viu Lascht abgnoh – es isch jitze eifach e Teil u nid eifach aues – und, wenn’s nid sött klappet ha, de isch es ke totale Schiffbruch.
Uf dr andere Site, wenn’s einigermasse härehout und mini Texte hie oder dert Reaktione, im beschte Fall chli Fröid oder sogar Nachedänke bewürke, de würdi das mi sehr fröiie u de macht es villich ou chli Luscht uf meh.
U jitze hani grad entdeckt, dass mis Wärkli scho uf Internet ds finde isch:
Ab em Mäntig cha mes bi mir ou bstelle über mi Shop u de geits A-Poscht use.
Dä Shop isch nämlech ds Zwöite, wo eigentlech aus Näbeprodukt i däm ganze Projekt ou no entstande isch: E Internetsite mit e mene Shop. Aues e chli handglismet…..I ha das ou wölle lehre, wie das so geit und was es aues derzue bruucht, we me wie ig weniger aus keni Programmierkenntnis het. Es geit auso (fasch) problemlos mit au dene Tools, wo eim zur Verfüegig gstellt wärde. U schüsch cha me ja uf em Internet so Videos aaluege.
Jitze muess i mi nume no derzue bringe, ou ds verzelle, dass da so nes Büechli git mit Gschichte ‚Fasch wie us dr Bibu‘ u wo mes cha bstelle. Das isch, so dänki, ds mingschte für mi, die gröschti Herusforderig.
Kommentar verfassen