I ha jitze no dr dritt Liedtext vertont. Im Hintergrund isch denn sicher Beautiful Morning vo dr Band Ace of base glüffe, wo dert ou singt, dass ds Beschte im Läbe gratis isch. I weiss no, mi het das denn irgendwie berüehrt. U wo ni mi de mit dr Versuechigsgschicht usenandergsetzt ha, (die Szene i Lk 4, 5-8, wo dr Tüfu Jesus aui Riichtümer vo dr Wält aabietet, wenn är, Jesus, derfür dr Tüüfu würd aabätte,) de hets mi tüecht, eigentlech blöde Vorschlag vom Tüüfu, wiu ds Beschte wo me im Läbe cha ha, das isch gratis, das muess gratis si, wiu Liebi immer nume gratis isch.
U i dänke ou hüt, üsere Wält und ou ganz ganz viune Mönsche giengs e so viu besser, wenn mir aui weniger em Materielle (wo mir eh geng zweni hei dervo) u weiss nid was für Macht- und Verwürklechungsaasprüüch würde nacheseckle, und is meh chönnte fröiie a däm ungloubleche Gschänk wo ds Läbe isch. Das sich irgendwie d Motiovation gsi hinder däm Lied.
Isch wie die beide andere ou handglismet mit hie u da nid ganz subere Tön – aber i ha Fröid gha, wo nis ha ufgnoh. Villich ghört me das ja ou.
U wie immer: Es söll nume aadütte, wie dass das so chönnt si…
viu, viu ds lang wott i nümm vo au däm züüg
wo ni ou no chönnti ha
viu viu ds lang wott i nümm vo au däm züüg
wo ni ou no chönnti ha
was söll i mit eme huufe gäld
u was mit aue,m goud vor wält
we ds beschte, wo mir ds läbe cha gäh
gratis isch?
Kommentar verfassen