Gebet für eine Erinnerungsfeier

Gott
D Tage wärde chürzer
U d Dunkuheit vo dr Jahreszyt umschliesst üs
U mir richte nis ii, daheime
I dr Wermi, gmüetlech, wenn’s geit
Kuschle nis uf em Sofa
I flauschegi Dechine
Es warms Getränk im Tassli
Zündte e Cherze aa
Wonis mit irem Liecht vo inne use wermt

U gliich, Gott
Du weisch, si fähle
Die Mönsche, wo no vor emene Jahr 
Aume näbe üs ghöcklet si
Die, wo mer si ga bsueche
Zu ine hei oder i d Heim
Mängisch voller Fröid
Mängisch vor allem us Pflichtbewusstsii
Si si nümme da
Nümme griifbar
Entschwunde

Grad i dene Tage vor Dunkuheit
Si si nis necher aus schüsch
U mir dänke a si
A Partnerinne u Partner
A Vättere, a Müettere
A Sühn u Töchtere
Wo nis hei verlah

Mir zündte Liechter aa für si
Wo nis chli vo dr Wermi verzelle
Wo si üs bedüttet hei
U geng no bedütte

Gott
Mir zündte Liechter aa
Wiu mir wei gloube, hoffe, vertroue
Dass dis Liecht wie für üs ou für die schiint
Wo üs vorusggange si
Für jedes einzelne

Es Liecht
Für aui, wo nis im vergange Jahr hei verlah
Für alli, wo dusse uf em Friedhof
Iri letschti Ruehestatt gfunde hei
Für üs alli
Wo geng no uf em Wäg si
Under dim wiite Himmu

U mir wei druf vertroue
Dass mir aui
Hüt hie u de einisch dert 
I dire Hand geborge si
Amen