Meditativs zu Matt. 5, 43-48
Vortreit im Gottesdienscht vom 2.März 2025 aus Teil vo der Reihe ‚Krieg und Ohnmacht‘ rund um e 3. Jahrestag vom Überfall vo Russland uf d Ukraine
Liebe Gott
'Liebe deine Feinde'
Wiu Du, Gott, d Sunne lahsch la ufgah über de Guete und de Böse
Schteit da, söu Jesus gseit ha, het Jesus gseit
'Liebe deine Feinde' – im Ärnscht?
Die, wo da mit Maschinegwehr chöme u aues churz u chlii schiesse?
Erbarmigslos u sinnlos Mönsche abschlachte?
Säg das mau a mene Ukrainer a dr Front...
Säg das mau a mene russische Soldat...
Säg das mau de Paläschtinenser im Gaza-streife oder de Israelis,
Wo bi Aaschleg u Vergältig iri Liebschte verlore hei...
'Liebe deine Feinde'
Das isch komplett gaga
U de seisch mer jitze de no
'Wenn dich jemand auf die rechte Backe schlägt,
dann halte ihm auch deine andere Backe hin!'
Echt jitz
Wie wältfrömd muess me si
Serige Blödsinn ds verzapfe
Das isch d Iiladig au die Scherge
Sich ds hole, was si wei
We sich niemer wehrt
U aui nume die anderi Backe o uno härehäbe
De geit aus vor d Hünd
'Liebe deine Feinde'
Nei, e so geits nid
Da muess me anders
Nid e so vertröimt
Da hets ke Platz für Romantik
Füür bekämpft me mit Füür
Da bruuchts Waffe, e Armee
Soldate, wo chöi kämpfe
Soldate, wo chöi töte
Mit 'All you need is love' hesch höchschtens ir Hitparade Erfolg
Aber nid, wenns drum geit
Rächt und Grächtigkeit wider härdstelle.
U Wort allei u fuuli Sprüch u frommi Gebätt
Häufe scho grad gar nid witer
Wenn i nume chönnt
I wüsst scho wie !
U de würdis dene mau zeige
Aber e so richtig!
Ufruume, Ornig mache
Grundlag lege für ne würkleche Fride
Für nes ..äh... tuusigjährigs Rii…
….
Das het doch scho mau eine wölle
Chunnt mir i Sinn
U d Lüt si nim hindernache marschiert
I die totali Unmönschlechkeit
Gäu, Gott,
Das ha ni de nid e so gmeint
Das isch ou nid das woni wott
I meine nume
Was söll me de schüsch mache?
Was cha ni de überhoupts no mache?
'Liebe deine Feinde'
Isch so ... so ungloublech anders
So frömd, so total jensits
Es widerspricht dr Logik
Es widerspricht mim Sinn für Grächtigkeit
Es widerspricht mim Verlange
Nach Rach u Genuegtuig
U warum söu i mi de nid benäh, wie aui andere ou?
Die wo Rücksichtslos iri Interässe wei düresetze?
Die wo sich e Name wei mache, choschts was wöu?
U de dänki a Jesus,
U i erinnere mi
Zmingscht du, Gott,
Bisch genau dä Wäg ggange
Dä vo dr Liebi
Dür Ungrächtigkeite, Treulosigkeit
Gemeinheit u Verrat
I dire Zuewändig zu de Mönsche
Uf dim Wäg a ds Chrüz, i Tod u drüber us
U jitze rüefsch du mi i d Nachfolg
Uf di Wäg, wo diner Masstäb sölle Gäute
U nid die, wo me so het, wiu me se het
E Wäg,
Wo d Liebi mis Verhalte söll bestimme
So wi si dis Handle bestimmt het
U das nid irgendeinisch imene blüemlete Paradies
Sondern genau dert, wo du Mi häre gstellt hesch
I dini Wält, i dini Schöpfig
I dänke a die, wo are Front kämpfe
Die wo müesse, wiu me nes befiut
Die wo wei, wiu si frei und unabhängig wei bliibe
I dänke a bombardierti Hüser
Au die Daheime
Wo nume no Ruine si
Verletzti, Toti , Sirene, Fürwehr u Sanität
U de wider Alarm u sich verstecke
U de wieder fürecho
Zum luege, was dismau isch troffe worde
Erschütteret ab au dere sinnlose Gwalt
Fassigslos, dass me so gnadelos cha si
Gö mir d Wort langsam uus
Säg, Gott, Isch da es Gebätt
Wo irgend wie no Sinn macht?
Was chame da no bätte
Wo nid hohl u überflüssig tönt?
U so stah ni am Rand vo dim Wäg
U frage mi, öb i mi Fuess söll druf setze
Di Wäg isch mer unghüür
Macht mir Angscht
Wiu i weiss, är choschtet mi aues
Aues
Wiu das isch dr Priis
Wo me zahlt uf dim Wäg
Ds Liecht vo dr Uferstehig
Flackeret unruehig u unbeständig
U meischtens isch es gar nid sichtbar
Wie söu i i dere Wält, wo Macht aues isch
Däm vertroue, wo uf aui Macht verzichtet het?
Hie, am Randstei vo däm Wäg
Wo du, Gott, ggange bisch
Vermische sich mini Sehnsucht u mini Angscht,
Mini Verzwiiflig u mi Muet
Hie, wo mir d Wort usgöh
u mis Überlege anes Ändi chunnt
gschpüre ni nume no mis Härz schlah
U i wirde still
Nume no still
Kommentar verfassen