I ha mi hüt mit dr Gschicht vom Brendan, em Seefahrer, beschäftiget. Sini Gschicht hani im Rahme vonere Chinderwuche vor paarne Jahr verzellt. I dere Chinderwuche heimer de ou zäme das Schiff bout, wo geng no im Gang vom Zwinglihuus in Langethal ds finde isch.
Brendan, dr Seefahrer, oder ou St. Brendan, isch e irische Heilige, wo, so verzellts d Legände, rund 1000 Jahr vor em Kolumbus si Fuess uf amerikanische Bode söu gsetzt ha.
D Gschicht vom St Brendan isch e Mischig us historische Fakte und viu Legändehaftem ganz i dr Tradition vo de keltische Erzählige vo dr Anderswält. D Gschicht vom St Brenden, e so wie si hüt verzellt wird, redt dervo, wie dr St Brendan sich mit 12 Gefährte imene Säguboot vo Irland us uf d Suechi nach em Paradies ufmacht, es Paradies wo jensits vom Atlantik irgendwo söu ds finde si.
D Legände redt de usfüehrlech u mängisch sehr detailliert vo dere Reis, bis dass dr St Brendan ändlech ds Paradies (dr nordamerikanisch Kontinänt?) tatsächlech fingt. Vo dert sägle är u sini Begleiter de speter nacheme lengere Ufenthalt wieder nach Irland zrügg.
E Forscher het i de 1970-er Jahr imene historisch nacheboute Curragh (es Schiff, wies dr Brendan söu bruucht ha gha) die Reis nachegmacht und isch zum Schluss cho, dass d Gschicht vom St Brendan natürlech sehr legändehaft usgschmückt isch, aber dass er durchuus jedi Station us dr Gschicht vom Brendan a de verschidene Orte, woner uf sire Reis aagfahre isch, het chönne feschtmache. Das heisst, zmingschte technisch und ou vo dr Ezählig här, so legändehaft wie si ma si, isches nid uszschliesse, dass irischi Seefahrer 1000 Jahr vor em Kolumbus (u 500 Jahr vor de Wikinger) bereits d Küschte vo Nordamerika bsuecht hei.
Em St. Brendan u sire Gschicht bini vor rund 35 Jahr zuefällig begägnet uf dr CD ‘Beyond these shores’ (Jensits vo dene Gestade) vo dr Bänd ‘Iona’. Die ganzi CD handlet vo dere Gschicht vom St. Brendan, womi schäll i ire Bann zoge het.
Speter, woni mi mit em keltische Chrischtetum ha afa beschäftige, isch mir dr St. Brendan aus eine vo de ganz grosse irische Heilige wieder begägnet. U dass i nume ganz zuefällig ( i ha mi verfahre gha….) d Stell gfunde ha, vo wo dr St Brendan uf dr Suechi nach em Paradies i Atlantik use gstoche isch, isch natürlech ds Tüpfli uf em I gsi. Me fingt a dere Stell e chliini Installation, wo a St. Brendan u sini Reis erinneret (uf dr Dingle Haubinsu bim Brendan Creek, nid wit vom bekannte Gallarus Oratory).
U äbe, de hani mi de mau entschide, d Gschicht vom St. Brendan im Rahme vonere Chinderwuche ds verzelle.
Woni mi hüt dra gmacht ha, die Gschicht wieder ds läse u ds bearbeite, hani gmerkt, wie sehr si mi geng no berüehrt. Au das Stuune, au die Fründlechkeit, das Geimnisvolle, aues das wo mi bis hüt am keltische Chrischtetum begeischteret, die Erzählige vor grüene Insle, wo so ‘handglismet’ si u gliich so ungloublech ghautvoll. U schliesslech hani d CD wieder füreghout u bi am Täxt vom Lied ‘Beyond these shores’ vo dr Bänd ‘Iona’ blibe hange, wo, so finde i, ganz viles ufnimmt, wo i dere Gschicht näb auem andere ou e Rolle spiut: es riisigs Gottvertroue.
Beyond these shores Jensits vo dene Ufer
Into the darkness I d Dunkuheit
Beyond these shores Jensits vo dene Ufer
This boat may sail Söll das Boot sägle
And if this is the way U wenn das dr Wäg isch
Then there will be De wird sich
A path across this sea E Pfad über das Wasser finde
And if I sail beyond U wenn I sägle
The farthest ocean Über e wiitischt Ozean us
Or lose myself in depths below Oder mi verliere i dr Töifi unde
Wherever I may go Wo immer i ou ga
Your love surrounds me Umgit mi dini Liebi
For you have been before Wiu du bisch früecher scho
Beyond these shores Jensits vo dene Ufer gsi
Schreibe einen Kommentar