I ha bim Düreluege vo de verschidene Texte gmerkt, dass mi ds Sujet ‘Fluss’ e Zyt lang äuä zimlech starch beschäftiget het. Dr Fluss aus Symbol für öppis, wo zwar geng i Bewegig aber gliich geng am gliiche Ort isch und daderbi immer Afang (Quelle) und Ändi (Meer) zäme verbindet. U das passiert i Form vo Bärgbächli u See, Schluchte und Wasserfäll. I finde, da laht sich doch zimlech viu Symbolik la drus use hole.
Am meischte aber het mi e eher zufällegi Begägnig mit emene Fluss berüehrt, woni einisch ds Lied ‘The River’ vom Bruce Springsteen am Radio ghört ha. Es het mi tüecht, i heig no nie es truurigers Lied ghört.
We'd go down to the river
And into the river we'd dive
Oh-oh, down to the river we'd ride
singt är, voller Truur und voller Wuet über verpassti Chance und ungerächti Startbedingige i ds Läbe. Dr Text hani denn nid eifach so verstande, bi däm aber nache ggange. Schliesslech hani Note bsorget (Internet sei Dank) u de probiert, meh schlächt aus rächt mir das Lied mit mire Gitarre aadseigne. Irgendwie hets mi aber de tüecht, i möcht gärn e eigeti Variante vo däm Lied mache. Ds Lied vom Springsteen handlet vo Sache, wo i, so wie är das singt, gar nid cha kenne. Was är besingt, passiert e so i de USA, bi üs aber höchschtens ähnlech, aber nid gliich. Wiu mir das Lied aber so gfalle het, hani mi dra gmacht, dervo e bärndütschi Variante probiere ds mache. Die Variante het ou e Gschicht sölle verzelle, wo ähnlich truurig isch, wie die wo dr Springsteen i sim Lied verzellt.
So isch de us em ‘river’ i mire Mundart-Variante d ‘Aare’ worde, usem junge Maa us em Tal (from down in the valley) de e junge Maa, wo ‘im Schatte vo de Bärge gebore’ isch. Natürlech het, wie im Lied vom Springsteenim ou, e letschtlech unglücklechi Liebesbeziehig e Rolle sölle spiele. E Beziehig, wo viu Tröim u Hoffnige dranne feschtgmacht wärde, wo aber us irgend Gründ verlore gö. D Schwangerschaft, wo im Lied vom Springsteen e wichtegi Rolle spiut, chunnt i mire bärndütsche Version nume aadüttet u imene andere Zämehang vor.
Truur aber ligt vo mir us gseh i beidne Variante (änglisch u bärndütsch) im Verpasse Chance, wo me genau weiss, die chöme nie meh. Dr Springsteen bruucht de um das ds illuschtriere ds Biud vom Fluss, wo uströchnet de dr Fluss us. I dr bärndütsche Variante risst dr Fluss vo dr Zyt aues unwiderbringlech mit sich furt.
Die chli witer under ufgfüehrti Textvariante in Bärndütsch laht sich einigermasse mit dr Originalmelodie la singe. Statt ‘The river’ heisst ds Lied mit däm Text eifach ‘Dunne er Aare’.
I bi dankbar für Kommentare u Aaregige.
Dunne er Aare
Strophe 1
Im Schatte vo de Bärge
Wo i gebore bi
Wird sälte eine meh
Aus si Vatter scho isch gsi
I weiss no wini se troffe ha
Weni d Miuch i d Chäsi ha bracht
De simer mängisch d Matte ab
Dür ds höche Gras
Chorus 1
De simer abe a d Aare
U mängisch simer dri
Dunne er Aare simer gsi
Strophe 2
U ds Wasser het mir Gschichte verzellt
Vo Orte, wo hie niemer kennt
Vo See und vo Fälder
Vom ewige Horizont
I weiss no, wi si mi aagluegt het
Woni ha gseit, i müessi gah
I fänd für üs e schöne Ort u
Holi si när oo
Chorus 2
De simer abe a d Aare
A däm Aabe simer dri
Dunne er Aare simer gsi
Strophe 3
U ds Wasser het mi tribe
Us de Täler i ds offne Land
Wo Wouche übere Himmu zieh
U dr Schatte ersch am Aabe chunnt
Immer mit dr Strömig
Wo mi langsam mit sich riist
Bis i ganz vergässe ha
Wo mis Härz blibe isch
Chorus 3
Es isch dert unde er Aare
Lue, ds Wasser fliesst verbii
Dunne er Aare simer gsi
Solo 1 Strophe
Strophe 4
D Bärge uf dr Charte
Wo si mir gschribe het
Hei die auti Sehnsucht
I mir wider gweckt
So nach u so klar u so brönnend heiss
U gliich so wit e wäg, we si schribt
Si heigi jitz e liebe Maa und es
Chind wo mini Ouge het
Strophe 5
I weiss no haargenau wie mir si zäme gsi
Dunne am Fluss, mi Schatz u ig
Iri wyssi Hut, ires länge Haar, ire Aate i mim Gsicht
U immer weni das Wasser gseh
Uf sim länge Wäg zum Meer
Wünschti mir, dass es rückwärts fliesst
Und i wär no einisch dert
Chorus 4
Dert dunne er Aare
Lue, ds Wasser fliesst verbii
Dunne er Aare simer gsi
Dunne er Aare
Mi Schatz u i….
Kommentar verfassen