D Gschicht vom St Patrick het üs denn im Herbscht 2016 dür die erschti Chinderwuche begleitet, woni je organisert ha. D Chind hei im Rahme vo dere Wuche verschideni Pöschte gha, wo si dises u äis hei chönne mache. Under anderem grossi Fänschterbiuder mit Illuschtratione vo de vier Evangelischte, wie me se im ‘Book of Kells’ fingt, derzue es keltisches Chrüz vou Farbe, mit irne Hand- u Fingerabdrück druffe.
Es isch extrem e farbegi Aaglägeheit worde u het Luscht gmacht uf meh Chinderwuche.
D Gschicht vom St Patrick isch ou e sehr e dankbari Gschicht zum verzelle: Dr jung Maa, wo vo Irländer bimene Überfall in Ängland nach Irland entfüehrt wird, dert de aus Sklav muess Schaf hüete, schliesslech flieht, wider hei chunnt, sich de laht la zum Prieschter usbiude um de schliesslech wieder aus ‘Sklav vo Gott’ nach Irland ds gah und dert de Mönsche die Gueti Nachricht ds bringe, isch e sehr e bewegendi Gschicht.
Das isch nid ds letscht ou deschtwäge so, wiume dervo usgeit, dass me mit zwöine Schriftstück, de ‘Confessiones’ vom Patrik und mit sim ‘Brief a Coroticus’ me würklech zwöi Schriftstück het, wo dr Patrick sälber verfasst het. Im Brief a Coroticus üsseret sich dr Patrick, wenn i das richtig verstande ha, aus erschte chrischtleche Theolog überhoupts gäge d Sklaverei.
Was mi ou sehr nachdänklech gmacht het, isch die (villich legändehafti?) Erklärig vo dr Drüeinigkeit, wo uf e St Patrick söll zrüggah. Si isch so viu eifacher aus aues, woni im Studium ha müesse (hät sölle) lehre u gliich nid ohni Substanz. Si isch irgendwie verständlech u nid e so abghobe wie die traditionelle Trinitätslehre.
Wiu i so fröid ha dranne, hänkeni hie unde grad dä Teil us mire Gschicht vom St Patrick aa, woner sine Zuehörerinne und Zuehörer Trinität anhand vomene Chleeblatt erklärt.
‘Ja, was isch de das fürne Gott, wo du seisch, är heig Himmu und Ärde gschaffe und d Liebi sig?’ heine d Ire gwundrig gfragt. U de het dr Patrick es Chleeblatt gnoh und gseit: Wienes Chleeblatt drü Bletter het, so zeigt sich Gottes Liebi üs Mönsche i drüfacher wiis:
Ds erschte Mal zeigt sich Gottes Liebi i däm, dass är d Wält erschaffe het. Lueget um öich ume: d Landschaft, d Natur, d Sunne, dr Mond u d Stärne, d Flüss, wo fliesse, d Wälle i Meer, d Vögu wo flüge, d Tier wo springe, dr Wind, d Wouche, Blitz u Donner. Aues isch erfüllt und Usdruck vo Gottes Liebi.’
‘Ds zwöite Mal’, u dr Patrick zeigt uf ds zöite Blatt vom Cleeblatt, woner i dr Hand het, ‘ds zwöite Mal zeigt sich Gottes Liebi, wo är aus Jesus uf die Wält isch cho und e Mönsch isch worde wie mir aui ou. E Mönsch, wo üs zeigt het, dass es nüt git, wo grösser isch aus d Liebi vo Gott. Nid emau dr Tod isch stercher! U drum fiire mir jedes Jahr ou Oschtere, d Uferstehig vo Jesus.’
‘U ds dritte Blatt’, het dr Patrick witer erklärt, ‘ds dritte Blatt isch dr Heilig Geischt. Das isch die Liebi, wo hüt und jitze zwüsche de Mönsche würkt. Immer dert, wo Mönsche enand Liebs tüe, dert isch ou Gott gägewärtig.’
‘Drum’, schliesst dr Patrik sini Erklärig ab, ‘drum rede mir vo Gott em Vatter, Gott em Suhn u Gott em heilige Geischt.’
Kommentar verfassen