I bi hüt miner aute Rock-the-Church-Gschichte düreggange. ‘Rock the Church’ isch es Projekt gsi i mire vordere Chirchgmeind, woni im Rahme vor Chiuchleche Underwisig mit 7. bis 9.- Klässler u -Klässlerinne aumes gmacht ha. Ds Ziu isch gsi, zunere biblische Gschicht Pop- und Rockmusik ds spile, wome zum Bispiu ou am Radio ghört het. Dr Gedanke derhinder isch dä, dass ou i säkularer Musik viu Theme ufgriffe wärde, wo i dr Bibu e wichtegi Rolle spile. Usgangspunkt aber isch immer e bibleschi Gschicht gsi, wome när passendi Musik derzue het müesse finde oder mängisch ou mache.
Für die Projekt hani under anderem uf ds Predigerbuech (Thema Vergänglechkeit), d Bärgpredigt (Untertitu: ungefiltert und roh), d Versuechigsgschicht und d Schöpfigsgschicht zrüggriffe.
Daderbi hei verschideni Gruppe vo Schüelerinne und Schüeler 3D-Illustratione zur Gschicht konschtruiert, hei Filme gmacht oder aber d Musik. Aues geng e chli handglismet, aber immer mit viu Iisatz.
Speter, wiu d Schüelerinne u d Schüeler (offebar?) nümme hei vorne Kamera wölle stah, isch de dr Fokus vermehrt uf dr Gschicht gläge. ‘Dr verlornig Suhn’, ‘Rock the X-mas’ mit ‘Fasch e Wiehnachtsgschicht’, dr Chrüzwäg, Gschichte vo Mönsche, wo mit Jesus ggässe hei (Thema Abendmahl) u d Gschicht vom Rägeboge (Noah) si ‘Rock the church’ gsi, woni no gmacht ha.
Letscht Jahr hani wider emau sones Projekt mit mire Konf-Klass dörfe dürefüehre. Dismau under em Titu ‘Crash’, d Gschicht vo dr Heilig vomene Glähmte, wie si im Markusevangelium ds finde isch. D Konfirmandinne u Konfirmande hei daderbi nid nume d Musik gmacht, sondern wäsentlech ou zur Gschicht sälber biitreit. Es isch de sehr e herti, e ärnschti Gschicht worde, aber haut ou e ehrlechi. D Konfirmandinne u d Konfirmande hei mir de erklärt, si heige das e so wölle!
Für mi sis vor allem gueti Erinnerige, woni mit au dene ‘Rock the church’ verbinde. I ha viu chönne usprobiere und mit de Schüelerinne und Schüeler mängs chönne mache, wo i (und si hoffentlech ou) viu Fröid ha gha dranne.
Ds Projekt ‘Rock the Xmas’, wo e Praktikant und i zäme e relative modärni Variante vor Wiehnachtsgschicht verzellt u derzue mit Schüelerinne u Schüeler Musik gmacht hei, isch für mi ds mingscht emotional eine vo de Höhepünkt vo mim Schaffe im Pfarramt blibe. U weni d Gschicht hie u da wieder lise, de berüehrt si mi eigenartigerwiis geng wider.
Dr Joseph (ir Gschicht dr Kevu) spiut e wichtegi Rolle i dere Erzählig. Är verlaht sini Fründin, wiu si vomene unbekannte es Chind erwartet. Es faut ihm aber schwär, wiu är seie geng no fescht gärn het. Was mache, i dere vertrackte Situation? I dr biblische Gschicht isches e Ängu, wo bewürkt, dass dr Joseph zur Maria zrügg geit. Da i keis Lied gfunde ha, wo sone Sitation beschribe hät, hani probiert, es eigets Lied, das heisst i däm Fall eher e Sprächgsang ds schribe, wo das gheimnisvolle Gscheh probiert ds illuschtriere, wo dr Joseph derzu bewegt, zur Maria zrügg ds gah.
Es heisst ‘Ängu i dr Nacht’ und nimmt d Situation uf, dass dr Joseph (oder äbe dr Kevu) truurig u verzwiiflet am Ändi vom Tag erläbt, wie d Nacht chunnt. D Nacht, wonim aues nimmt, d Nacht, wonim e Ängu begägnet.
ängu i dr nacht
die letschte farbe vom tag brönne mir i de ouge
wärde dunku u verschwinde langsam
wärde verschlückt vo däm horizont
wo erbarmigloos, gnadelos
aus ufsugt u nie gnue überchunnt vo däm woni bi
allei u no so viu meh bi dir
d wält geit under, d wält geit under,
ewegi bärge blüete ihres läbe us
i dere fluet vo schätte überem land
im verklinge vo dr symphonie erstrahlt d liebesgöttin häll und klar
wunderbar, unberüehrt vo dr dunkuheit, wo mir ds läbe zuetreit
irgendwo am himmu unerreicht
u we ds licht um mi verheit
bini nume no die hülle, wo dr nachtwind mit sich treit
biuder über mir tanze im kreis zure melodie, woni nume cha erahne
zärtlech leit sich siuberliecht über mini seel
geborgeheit i dere nacht, wo mir so viu fählt
u so viu gheimnis u so viu schönheit u so viu fiinheit
ewigkeit wo dür mi düre geit
u mi heilt u befreit
u lisli zue mer seit
da isch e ängu i dr nacht
Kommentar verfassen