E paar Gedanke zu Offebarig 21, 1-8
Liebe Gott
I lise i de letschte Site vo dr Bibu
D Vision vom nöiie Himmu u dr nöiie Ärde
Wo du wirsch bringe
E Wält ohni Tod, ohni Truur, ohni Chlag u ohni Qual
Aues wird nöi, aues isch nöi
Wie am erschte Tag vo dr Schöpfig
U aui wo Durscht hei
Überchöme vom Wasser vom Läbe bis gnue
Fride statt Chrieg
Versöhnig statt Hass
Zuewändig statt Gliichgültigkeit
Ja, Gott,
We ni um mi luege dänk i:
Mach vorwärts!
Ändlech
Mit dire, dere nöiie Wält
Du gsehsch ja
Üsi isch zimlech am Rumpf
D Mönsche hei weder Sorg zu sich
No zu dere Schöpfig
Wo du ine aavertrout hesch
Wie guet wärs
We mer no einisch chönnte aafa
Vo vorne, ganz nöi
Weisch
E so unbeschwärt
So schamlos glücklech
Dass aui u jedes doch no cha erblüehie
Wie dus vo auem Aafang
I iri Härze gleit hesch
Ja, Gott, mach aues nöii!
Aber säg
Warum de da no das Meer
Us brönnendem Schwäfu
Wo du aui drinne entsorgsch
Wo dir nid passe?
Isch das würklech nötig?
Warum e zwöite Tod für aui
Wo nid bestande hei?
Wo blibt da dini Liebi?
Wo blibt da dini Vergäbig?
Isch de Jesus für aui die
Wo da wäggheit wärde
Nid ou gschtorbe?
Das darf doch nid wahr si!
Das passt jitze
Ehrlech gseit
Überhoupts nid
Zu mine Idee vo däm
Was es sött bedütte
Wenns e nöii Ärde
Und e nöiie Himmu git
Sicher nid e so!
Da wott i kes Meer us brönnendem Schwäfu
Für aui die, wo nid gnüege
Geit’s no?
De chöi mer doch grad witerfahre
Wie bis jitze
U de si da plötzlich
Die unbequeme Frage
Es Flüschtere
Wo dür mini Gedanke geischteret
Öb i de überhoupts e nöii Wält möcht?
Das ganz andere?
U wie ni mir die Wält de vorstelle?
Aues irgendwie guet u fridlech u versöhnt?
U de sött de gliich irgendwie
Aues bim Aute blibe?
Di Frag a mi:
Was muesch du aues ablege u wäggheie
Für dass du ine Wält ine passisch
Wo’s ke Tod, ke Truur, ke Chlag und kes Liide me git?
Säg
Wie viu blibt no vo dir
Wenn du dis Liide
Dini doch so berächtegti Wuet
Dini Verletztheit
Dis 'i ha uf jede Fall Rächt'
Dini Truur
U dini Schönfärbereie
Mau näbe use tuesch?
Lue, au dä Plunder het
I Gottes nöiier Wält nüt verlore
Das chaisch nid mitnäh
Wenns würklech nöi söu wärde
Richtig nöi
So ganz anders
De gits viles
Viles ou wo di usmacht
Wo ke Platz me het
Wo de muesch zrügglah
Oder haut äbe
Verbrönne
Vergässe
Vergäh
U jitze auso
Wosch geng no e nöii Wält?
Oder eifach nume
Dass das, wo du kennsch
Ersetzt
Oder eifach
Restauriert u poliert wird?
Nöi heisst:
Was vorhär isch gsi
Das isch nümme
U was isch
Isch vorhär nid gsi
Gottes nöii Wält
Isch nid eifach
Zuckerwatte u Plüschtier
Sondern erwartet offebar
Dass i mi ganz u gar
Däm uslifere
Wo usem Nüt use
Aues i ds Dasii rüeft
Däm, wo Tots
Wieder läbig macht
Däm, wo aues
Aues nöi macht
Ou mi
Kommentar verfassen