Die Unheilige Allianz zwischen Stadtratspräsident und Pfarrer unterwegs in Langenthals Beizen, im Video im Chrämerhuus.
Ds persönleche Reduit
Dr Trump tuet dert im Wiise Huus jitze e Ballsaal boue
Mit grossem Saal u Chuchi u dr Lounge, die chaisch de mau ga gschoue
Me ghört Iigweihti im Versteckte ganz liisli verzelle
Plant sig für e Chef ou e grossi Gummizälle
Gruusig: Cheffe, wo für d Firma aues mache
Dass e Chef sich mit de Produkt vo sire Bude identifiziert
Hei d CEO’s vo Roche u Novartis iidrücklech demonstriert
Nei, nid Tablettli oder Säftli, doch si verdienti e Orde
Dass si bim Trump im Oval Office si zu Zäpfli worde
Gruusiger
Für Toilettepapier git’s i de USA jitze es Verbot
Es isch dr göttlech Präsident himself, wo das e so wott
U derwile d Amerikaner jitze töif ir Schissi stecke
Het dr Trump geng öpper hinder sich, wo ihm dr Arsch tuet läcke
Am grüüsigschte
Dä Horrorfilm eismau im Fernseh – dä het mi zimlech troffe
Da isch plötzlich e grüeni Stinkschlimmasse us mim Fernseh gloffe
I ha kotzet, hueregrussig, u si bringes zur beschte Sändezyt
Dr Infantino wo em Trump dr Fifa- Fridenspriis übergit, igitt
Es heis aui gseh, nume dr Schiri nid
I de USA da gits e Sprütze - in Russland wirsch us em Fänschter gheit ,
In Soudiarabie wirsch de köpft, in Katar eifach a d Wand gstellt
Warum d Fuessball WM geng so Länder gäh wird, cha ni nid begriiffe
Da fäut jitz ächt e VAR, wo d Fifa- Tuble würd zrüggpfiiffe
• U d FuesballWM 2038 u das isch konsequänt
• Plant d Fifa im Iran – dert wirsch de ghänkt
Ufschnuufe
Im WEF ds Davos da trifft sich jedes Jahr was Rang u Name het
Amne Ort wos schöni Bärgwält u ou früschi Bärgluft git
I frag’ mi scho warum die Dame u Herre statt dusse schön ds flaniere
Lieber im gschlossne Ruum die nöischte Fürz vom Trump tüe inhaliere
Wahrsagerei: Fritig 12.Juni 2026, Los Angeles
D ICE-Behörde i de USA hei e Terrorgruppe gfasst
Elf Ussländer i Uniform – guet het ICE ufpasst
Die hei imne Terroraaschlag e schwäre Ball gäg Amerikaner wöue schiesse
U so het d Fuessball-Nati vo Paraguay no vor em erschte Spiu hei müesse
Houptsach Lächle
Xixi ping, dr Putin, Kim Jong Un chaisch uf däm Foto gseh
Ou dr Ueli Muurer isch aus Gascht bi däm Feschtli under Fründe gsi
Er söu, es isch si uftrag gsi, schön Zähn zeige bim lache
Wiu näb däm Labubu-Bäbi Diktatore (geng no) fei e gueti Falle mache
Künschtlechi Vernunft
Die künschtlechi Intelligänz isch logisch und stringänt
Umfassend, alles wüssend, schnäll und konsequänt
Drum duurets sicher nümme lang und de wird si ganz verbotte
Wiu si um d Umwält ds rette, d Mönschheit würd usrotte.
We de A seisch muesch dr ou B chönne leischte
Wäg dr Nachhaltigkeit sig 10 Millione Lüt ir Schwyz de gnue
U dass es kei einzige meh wird, da luegt me sträng derzue
Vergässe geit dass d muesch i d Biudig inveschtiere mit grosser Chelle
Schüsch fingsch glii niemer meh wo no uf 10 Millione chönnti zelle
A letschti Chance
D Drohne vo dr Schwizer Armee, die si geng no nid startklar
Chönntsch meine, dass die mau flüge, das wärdi nieh me wahr
E letschti Chance u ds EMD nimmt jitz die Sach ganz fescht a d Zügu
U tanket d Drohne jitz mit Red Bull – das verleiht bekanntlich Flügu
–So primitiv – we dr Mani Matter das wüsst
Nach dr Melodie vo: Si hei dr Willhälm Täll ufgfüehrt
C G7 C
Si hei dr Willhäm Täll ufgfüehrt ar SVP Versammlig
C G7 C
Dr Dettling schwingt si Hellebarde, u ds Volk wird geil u rammlig
E7 am G7 C
D EU-Verträg, si gfigget, u dr Dettling chiichet schwär
F C G7 C
Si würde d Freiheit gwinne, wenn si dä Wäg ds gwinne wär
F C G7 C
Si würde d Freiheit gwinne, wenn si dä Wäg ds gwinne wär
Sälber dschuld
D Schuelsozialarbeit u ds Familiezäntrum si ds Langethal nie cho
U dass d Chindergärte abgschifft si, das het me ds Bärn verno
Drum dänke die dert d Langenthaler, die wirsch nid verdriesse
So viu wie dene Chind wärt si, chöi mir d Geburtsabteilig schliesse
Ou e chli gruusig
Die Linkke hei in Burgdorf Pissoirs us de Schuele verbannt
Jitze hocke aui gliichberächtiget uf em verbislete WC-Rand
Hie ds Langethal da miechs ke Sinn, so nes Gliichstelligs-Zeiche
Solang d bim Brunne uf em Wuhrplatz nur im Stah chaisch seiche.
Ufgrüschtet
Im VW-Chäfer isch me früecher mit füfchöpfiger Familie
Mit Campingusrüschtig fröhlich übere Gotthard nach Italie
Hüt bruchsch e SUV Panzer wo d dermit e Wältchrieg chönntisch gwinne
Für di Sougov mit sim Schueusack 200meter i d Schuel ds bringe
Haubi Portion
D Halbierigsinitiative het sich scho uf dä Schnitzubank nidergschlage
Öb i mir ganzi no cha leischte, muess i, mi scho frage
Lä Lä Lä Lä Lä
Das änderet nid würklech öppis
Hüratsstraf söu abgschafft wärde, isch hüt dr Tenor
Finanziell tüeg das entlaschte , tönts vo überall im Chor
Dasch höchschti Zyt dass öppis geit, dänk i mir derzue
Wiu Hand uf ds Härz verhüratet si, isch doch würklech scho Straf gnue
Lääängwiiilig oder Grossratswahle 2026
Vo de Plakatwänd luege mi d Gringe a u buhle um mini Stimm
Mit de gliiche laasche öde Sprüch wie geng , i findes schlimm
Da gseh ni eine, so originell, dä wähl i, mis Härz het glacht
Bis i ha gmerkt das isch ke Kandidat – dä het für Ovo Wärbig gmacht.
Langethaler Verchehrs-Fluss
Es isch eine uf dr Fahrt im Outo vo Mälchnou uf Aarwange
Uf höchi Bäre zum Outo us, wo är im Stou isch gstande
Chouft es Buech bim Bader um de wider zrügg i Stou ga ds stah
Im Aarwangekreisu vore het er Herr der Ringe gläse gha
Men at Work
In Langethal gits hie u dert geng wieder so Boustelle
U über die am Bahnhof muess i öich ja würklech nüt verzelle
Bouschtelle chöme u gö wider, s isch dr Louf vor Zyt
D Usnahm blibt Stadtratbouschtell Auti Mühli, wo für ewig blibt
Patrioteschi Pflicht
We d Mehrwärtstüür für ds Militär erhöht würd, tät i mi nid wehre
Fasch eis Prozänt vo jedem Umsatz für d Armee, hiuft mir ds erkläre
Los Schatz i weiss s isch viu ds viu Gäud doch muesch jitz eifach gseh
S isch für d Verteidigung vo üsem Land, drum chouf i dä Porsche
Wo eim ds Läbe e so häretribt
Üse Stapi isch aus Stapi scho geng chli am schwümme
Jitz gieng er gärn i d Aare ds Bärn , d Langete längt ihm nümme
Aus Regierigsrat im Eicholz drii, im Marzili wider drus
De blibe nur no e paar Stuefe, de bisch bim Bundeshuus
Mir wünsche nume ds Beschte
Üse Stapi wott nümm Stapi si, är würd gärn Regierigsrat
Bösi Zunge bhoupte: Dr Herr isch sich für Langetau jitz ds schad
Doch mir wünsche ihm vo Härze dass die Wahle guet tüe usecho
Wiu aus Regierigsrat isch er wit wäg ds Bärn, weisch wie wäre mir da froh
Es Loblied uf d Langethalerinne u d Langethaler
D Lüt in Langetau si fründlech, nätt u tolerant
Geduldig, achtsam, güetig, s isch überall bekannt
Hei es Härz gross wie dr Thunersee – doch chaisch di grad verpisse
We d meinsch chönnsch ds Langethau cho wohne und e Olte Fahne hisse.
Nachtrag – Politik u Religion
Dr Stadtratspräsident u dr Pfarrer, die si am intrigiere
Ändi Mai isch villich dr Stapi wäg, das bringt se i ds studiere
So schmide si zu de Schnitzubänk o dunkli Plän wo niemer kennt
U am Schluss, wirsch gseh, wird de dr Pfarrer dr nöi Stadtpresidänt
Kommentar verfassen