Bibleschi Epstein-Files

E bibleschi Gschicht am Fasnachtsgottesdienscht 2026, inspiriert vom Buch ‚Der König David Bericht‘ vom Stefan Heym. Läsenswärts Buech!

Dr Chünig Salomo, dr grossartig, unvergliichlech u einzigartig Chünig vo Jerusalem, het es Problem, jitze, wo ner ändlech Chünig isch.

Eigentlech het er gmeint, är sigi d Problem los, nachdäm är si euter Haubbrueder u müglech Thronaawärter Adonija u die auti Garde vo sim Vater, em Chünig David, eliminiert het. 

Aber nei, jizte hei Problem ersch aagfange.

Är sig gar nid dr legitim Chünig, het es viune Orte, ja a viu zu viune Orte gheisse. 

Natürlech chönnt är, dr Salomo,  mit Soldate, ICE u Gheimer Staatpolizei u was es ou immer bruucht, sich sini Macht mit Gwalt erhaute. Aber dr Salomo weiss ou haargenau, dass wenn er sine Soldate dr Befähl git, mit Gwalt für Rueh u Ornig ds sorge, de würd in Zuekunft vo ihm sicher nid vom greatest President ever gredt… i meine, vom  unvergliicheche Chünig Salomo, wo so gschiid isch gsi wie vor ihm u nach ihm höchschtens, auerihöchschtens dr Donald Trump.

U jitze isch ou no ds Grücht ufcho, är sigi gar nid dr Suhn vom Chünig David, sondern vom Ex vo sire Muetter Batseba, em Elitesöldner Uriah. Dä isch inere Schlacht under mysteriöse Umständ gschtorbe u an sich keis Problem. U dr Chünig David, wo es Gschleipf het gha mit dere Batseba, het se ja de glii nach em Tod vo irem Ex ghürate.

Nume äbe isch vom Tod vom Uria bis zur Geburt vom erschte Suhn vo dr Batseba scho sehr, sehr weni Zyt vergange. Drum hautet sich das Grücht hartnäckig, dass dr Salomo am Änd gar nid dr Suhn vom Chünig David sig sondern vom Ex vo dr Batseba, u de chönnt är uf gar ke Fall Chünig si…

Dr Chünig Salomo het auso zwöi Problem: 

Erschtens: Är muess irgendwie chönne belege, dass er tatsächlech dr Suhn vom grosse Chünig David isch.  

Zwöitens: Är muess ou no erkläre, warum dass är, dr Salomo, dr rächtmässig Chünig isch uf em Thron in Jerusalem u nid si euter Haubbrueder, wo – eh – äbe – eliminiert isch worde.

D Lösig für e Chünig Salomo het sich de ergäh, wo dr Lobbyischt Nathan ihm folgende Vorschlag gmacht het: Liebe Chünig Salomo, du tuesch mi zum dim einzig wahre Prophet befördere, wo dir Gottes Wille kundtuet –  i meine, aus Lobbyischt mach i das ja sowieso – u de müesse mir no e paar Dokumänt entwärfe, wo bezüge, dass i scho zu Zyte vo dim Vatter Chünig David bi tätig gsi am chünigliche Hof.

Am beschte scho denn aus Prophet, aus e Prophet vo Gott, aus rächtschaffene Maa, es Bollwärk vo Aastand u Gsetzeströii, eine, wo sich scho denn nid gschöit het, däm grosse Chünig David d Meinig diräkt i ds Gsicht ds säge, e so ne Liechtgstaut, e so ne Garant vo Wahrheit u Korräktheit, e Maa vo Gottgefälligkeit. 

U so entsteit schliesslech um dä Prophet Nathan ume mit e chli Phantasie u viu Gschick und ere Priise Skrupulosigkeit e fantasteschi Gschicht, wo aues zäme verbindet, wo eigentlech gar nid zäme ghört, aber e so d Problem vom Chünig Salomo cha löse. U zwar söfu gschickt, dass me die Gschicht jahrhundertelang aus bari Münze het gnoh.

U de wird spintisiert u dichtet u schliesslech verzellt: 

Vor langer, langer Zyt, wo dr Chünig Salomo no gar nid uf dr Wält isch gsi, het dr Chünig David einisch dr Prophet Nathan gfragt: Säg, söll i Gott in Jerusalem e Tämpu boue? 

U dr Prophet Nathan het uf Gottes Wille glost und em David erklärt: 

E Tämpu isch ok, aber nid du söllsch  dä Tämpu boue, sondern di Nachfolger. U wiu dr Salomo denn no gar nid wär gebore gsi, fählt hie natürlech e Name. Aber derfür isch plötzlech Gott jitze ou mit im Spiu i dere Thronfolgegschicht. Eifach scho huereguet iigfädlet.

Wo de die Gschicht under ds Volk isch bracht worde, het dr Chünig Salomo grad mit em Bou vom Tämpu aagfange gha. Zuefäll gits… ‘Das isch doch dr Bewiis, dass dr Salomo dr Gottgewollt Chünig isch!’, het me em Volk chönne vertiggere. U die heis gschlückt.

U jitze muess me nume no die anderi Gschicht e so chli dräihe, bis si passt.

Die Gschicht vo dere Nacht, wo dr Chünig David uf em Dach vo sim Palascht umewandlet u im Dämmerliecht e Frou gseht, wo nim chli ds fescht gfalle het. U de het är se zu sich la rüefe, u si het äbe Batseba gheisse, und si isch cho und es isch cho wies het müesse cho. Churz: Si het nach däm royale Rendez-Vous de es Chind erwartet. Wär aues nid e so schlimm, wenn die Batseba  äbe nid scho verhüratet wär gsi mit em Uria, emene Bruefsmilitär vo nere Elitesoldate-Einheit, wo grad im Fäld isch gsi u sicher nid daheime bi sire Frou. Die Ehebruch-Gschicht rittet zwar dr Chünig David i Seich – so aus Ehebrächer macht ou e Chünig ke gueti Figur – aber macht haut de ou us em erschte Suhn vo dr Batseba e Suhn vom Chünig David.

U jitze cha me dr dr Chünig David no schlechter mache i dere Gschicht, indäm me verzellt, dr Chünig David heig dr Befähl gä, derfür ds sorge, dass dr Uria, äbe dr Maa vo dr Batseba, die nächschti Schlacht nid überläbt, dermit er d Batseba cha hürate.

U schliesslech, viu ds glii, schänkt si amene Bueb ds Läbe.  Das wird natürlech Publik: D Frou vom Chünig David, auso eigentlech öppe sini 10.-i Frou,  het es Chind übercho.

Aber d Lüt die chöi haut scho zu dere Zyt bis uf nün Mönet zelle… u so haute sich Grücht, dass villich, dass wahrschiinlech oder sogar dass sicher nid dr Chünig David Vatter isch vo däm Bueb, trotz dere Affäre, wo d Batseba mit em Chünig David het wölle gha ha. 

Auso muess me uf Nummer sicher ga, dass dr Chünig Salomo uf gar ke Fall dr Suhn vom Uriah cha si.  U am beschte macht me das, indäm me eifach erklärt: Das erschte Chind vo Batseba u David, das isch gschtorbe. 

Drum wird de verzellt, dr Prophet Nathan sig i heiligem Zorn zum Chünig David u heig ihm d Chuttle putzt: Du hätsch jedi Frou chönne ha aber du hesch d Monica Lewin… eh nei, dasch dr ander Löu gsi…  Du David,  hesch dr Uria la stärbe um sini Frou, d Batseba, chönne ds ha. Em David tuets jitze – ömu i dr Gschicht –  natürlech extrem leid u drum wird är verschont vo Gottes Gricht. Aber ‘Strafe muss sein’ u drum muess ds Chind, dr erscht Suhn vo dr Batseba aus Straf für ds Verschulde vom Chünig David stärbe. 

U das passiert natürlech de ou so, wie dr muetig Prophet Nathan het vorusgseit, wo em Chünig David isch entgägeträtte u nim d Chuttle putzt het. Ja, dä Prophet isch e wahre Gottesma, eine wo ou nid vor Chünige kuschet. Däm chame bedingigslos vertroue, dä seit d Wahrheit u nüt aus d Wahrheit.

U de het d Batseba äbe amene zwöite Suhn ds Läbe gschänkt, äbe em Salomo, zwiifulos Sohn vom Chünig David. U dr Prophet Nathan sig scho glii bim David verbii und heig ihm gseit, das Chind wärdi vo Gott bsunderbar gliebt. Da steit zwar no nüt vo Chünig, aber dass mit dere Gschicht dr nächscht Chünig, dr nächscht vo Gott igsetzt Chünig vorbereitet wird, isch aune klar.

Dr Prophet Nathan toucht de ersch viu speter, wider a entscheidender Stell uf, denn we ds letschte Stündli vom Chünig David schlaht. Da wird verzellt, wie ihm dr Chünig David am Stärbebett dr Uftrag heig gäh, dr Salomo zu sim rächtmässig Nachfolger ds chröne. U wär würd je am Wort vo däm wahre Gottesmaa zwiifle?

U so het dr Salomo sini Problem glöst. U bis hüt verzellt me vor allem dervo, dass dr Chünig Salomo dä sig gsi , wo in Jerusalem dä gross Ballsaa…. i meine Tämpu het la boue und sich vo aune für sini überragendi Wiisheit het la lobe u priise und schliesslech aus gschidschte Ma je isch verehrt worde. Zwiifulos hät er e Fridensnobälpriis verdienet gha, wenns denn scho eine hät gäh.