Bim Düreläse u Korrigiere vom zämegstellte Material ha ni gmerkt, wies a mir faht afa nage. Es isch ds viu, viu ds viu, wo ni da ha vor gha. Da si verschideni Hürde uf einisch da gstande: Inhaltlechs, Emotionals, vili Unsicherheite, wiu für mi das es erschts serigs Projekt isch, und ganz am Rand ou chli Finanziells. I bi geng e chli närvöser worde. Schliesslech isch mir us e mene Kurs, wos drum ggange isch, Projekt ds entwickle, dr ‚Dummy‘ i Sinn cho. Mau e Versuechsballon la starte, eine wo funktioniert u Sinn macht, aber eine, wo we ner e Bruchlandig häreleit, nid ds Projekt aus ganzes gfährdet u me de aues häreschmeisst, sondern e Versuech söll si, wo me nid ds letscht viu Erfahrige macht u viu drus cha lehre, um es de bim nächschte Mal besser ds mache.
So ha ni mi entschlosse, nid eifach aues (und es wäre ja eigentlech äbe no nid aues) eifach zwüsche zwe Buechdechle ds presse, sondern mau mit emene Teil dervo aadsfah. So wirde ni mi für das erschte Projekt uf Texte beschränke, wo meh oder weniger e diräkte Bezug zu mene biblische Text hei. Das si chli vo aune Gattige (Erzählige, Liedtexte, Gedicht und Meditatione), aber under em Strich no e guete Drittu vom Material, wo ni bis dahäre zämegstellt ha.
I ha gmerkt, wies mir gwohlet het. So dänki, ma nis stemme. U wenn’s einigermasse usechunnt, steit ja emene witere Projekt, zum Bispiu de Gschichte vom St Patrick und em St. Brendan, wo scho relativ wiit fortgschritte si, nüt im Wäg.
Däm Test-Dummy ha ni mau dr Arbeitstitu ‚Fasch wie us dr Bibu‘ ggäh, mit Undertitu: Zum Läse u Vorläse. Mau luege, was de da genau drus wird.
Mit dr Beschränkig uf e nes erschts Drittu vom Material, wirde ni ou e chli e grösseri Schrift wähle, dass es gäbiger geit zum Vorläse, wiu letschtlech, so dänki, si vor allem d Erzählige zum Vorläse u Verzelle gmacht.
Kommentar verfassen